АДОЛАТ ВА ҚОНУН УСТУВОРЛИГИ – ИНСОН ҚАДР-ҚИММАТИНИ ТАЪМИНЛАШНИНГ ЭНГ АСОСИЙ ШАРТИ

Ўзбекистон Республикаси Олий суди раиси Козимжон КОМИЛОВнинг “Янги Ўзбекистон” ва “Правда Востока” газеталари бош муҳарририга интервьюси

2017-2021 йилларда Ўзбекистон Республикасини ривожлантириш бўйича Ҳаракатлар стратегиясининг иккинчи — ҚОНУН УСТУВОРЛИГИНИ ТАЪМИНЛАШ ВА СУД-ҲУҚУҚ ТИЗИМИНИ ЯНАДА ИСЛОҲ ҚИЛИШНИНГ УСТУВОР ЙЎНАЛИШЛАРИ бўйича амалга оширилган ишлар

— Президентимиз Шавкат Мирзиёев ташаббуси асосида бундан беш йил олдин халқимиз билан бамаслаҳат 2017-2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегияси қабул қилинди. Ўтган даврда ушбу стратегия асосида мамлакатимиз ҳаётининг барча соҳаларида, шу жумладан, суд-ҳуқуқ тизимида кенг кўламли ислоҳотлар амалга оширилди.

Козимжон Фозилович, гап шу ҳақда борар экан, Сиз билан суҳбатимиз аввалида Ҳаракатлар стратегияси асосида мамлакатда қонун устуворлигини таъминлаш, суд-ҳуқуқ тизимини янада ислоҳ қилиш борасида амалга оширилган ишлар таҳлилига тўхталишни жоиз топдик.

 Батафсил:Адолат ва қонун устуворлиги — инсон қадр-қимматини таъминлашнинг энг асосий шарти (yuz.uz)

28 нафар самарқандлик маҳкум афв этилди

    Конституция қабул қилинганлигининг 29 йиллиги муносабати билан давлатимиз раҳбари фармони билан республикамиз бўйича 182 нафар шахс афв этилди.

    Вилоят ИИБ пробация бўлими катта инспектори Нодир Каримовга кўра, афв этилганлар орасида 28 нафар самарқандлик маҳкум ҳам бўлиб, уларнинг ўз уйларига қайтарилиши оналари, аёллари, фарзандлари қалбини шодликка тўлдирди.

    Оиласи бағрига қайтган собиқ маҳкумларнинг катта қисми Ургут тумани (10 нафар) ва Самарқанд шаҳри (5 нафар)да доимий рўйхатдан ўтган. Шунинг­дек, афв этилганларнинг 1 нафари аёл киши, 3 нафари 60 ёшдан ошган фуқаролардир.

  Жазодан озод этилганлар билан суҳбатлашар экансиз, қилган ишларидан пушаймонликларини таъкидлаб, билдирилган ишонч учун халқимизга, ҳукуматимизга миннатдорлик билдирмоқда. Бундан буён ҳалол ишлаб, оиласи ва юртимизга наф келтиришга ваъда бераётир.

    Албатта, уларнинг жамиятга мослашувини таъминлаш, ҳар томонлама ёрдам кўрсатиш долзарб вазифалардан саналади. Бу борада тегишли идоралар билан ҳамкорликда зарур чоралар кўрилади.

МАҲАЛЛАДА ЖИНОЯТЧИЛИК МУҲОКАМА ҚИЛИНДИ

Каттақўрғон шаҳридаги “Оқ олтин” маҳалла фуқаролар йиғинидаги 802 та хонадонда 4552 нафар аҳоли истиқомат қилади.
Оқ олтин маҳалласида катта бунёдкорлик ишлари амалга оширилган. Ички йўллар ва пиёдалар йўлаклари, электр энергияси, табиий газ, ичимлик суви тармоқлари янгидан таъмирланган. Маҳаллада файз бор, ободлик, орасталик бор.

   Маҳалла биноси ҳам янгидан қурилган. Бу ерда раис, ўринбосарлар, участка нозири учун алоҳида хоналар, қишки мажлислар зали ва ёзги айвон мавжуд.
Хуллас, маҳалла ҳавас қилгудек. Бироқ, маҳаллада жиноятчилик нисбатан ошганлиги эътибордан четда қолмади. 2021 йилнинг 11 ойи давомида маҳаллада жами 6 та жиноятчилик содир этилган. Яъни, 1 та фирибгарлик, 1 та ўғрилик, 1 та тан жароҳати етказиш ва 3 та гиёҳвандлик билан боғлиқ жиноятлар содир этилган.
Самарқанд вилоят суди раиси О. Ҳайитов ва вилоят маъмурий суди раиси Т. Файзиев маҳаллада аҳоли вакиллари билан учрашиб, давра суҳбати ўтказишди. Давра суҳбатида жиноятчилик ва ҳуқуқбузарликларнинг барвақт олдини олиш, сабаб бўладиган омилларни бартараф этиш, маҳалла фаоллари ролини ошириш мавзуларида суҳбат бўлди. Содир бўлган жиноятлар таҳлил этиш баробарида келиб чиқиш сабаблари муҳокама қилинди.

Тадбир давомида вилоят судлари раислари сайёр қабул ўтказиб, фуқароларнинг муаммоларини тинглашди. 30 яқин фуқаро вилоят судлари раисларига мурожаат қилишди. Ерга оид, шартномавий муносабатлар, кредит билан боғлиқ низолар, шунингдек, юритилаётган жиноят ишлари бўйича ҳамда жазодан озод қилиш масалаларида мурожаатлар бўлди. Уларнинг ҳар бири бўйича ҳуқуқий тушунтиришлар берилди, суд-ҳуқуқ масалаларига оид мурожаатларнинг бир қисми жойида ҳал этилди.

Шунингдек, жиноят ишлари бўйича Каттақўрғон шаҳар суди томонидан сайёр суд мажлиси ташкил этилди. Сайёр судда содир қилган жиноий қилмиши учун жазо ўтаётган 21 нафар шахс жазонинг ўталмай қолган қисмидан озод қилинди. Албатта, ҳар бир ҳолат алоҳида ўрганилиб, шахснинг қатъий тузалиш йўлига ўтганлиги, жазодан тегишли хулоса чиқарганлиги эътиборга олинди.
Маҳалла аҳли мазкур тадбирдан жуда мамнун бўлди. Маҳалла аҳлининг аҳиллигини ошириш, ҳар хил иллатлардан тозалаб, обрўсини оширишга ваъда беришди.

Маълумки, Ўзбекистонда «Гендер асосидаги зўравонликка қарши 16 кунлик фаол ҳаракатлар» қўшма кампания иш бошлаган. Шунингдек, 9 декабрь – Коррупцияга қарши курашиш куни муносабати билан қатор тадбирлар ўтказилмоқда

Шу кунларда Самарқанд вилоят судининг судьялари ҳам таълим даргоҳларида “Коррупция – жамият ривожига тўсиқ” ва “Зўравонликка дарҳол барҳам берамиз” мавзуларида очиқ дарс ва мулоқотлар ўтказишмоқда

Вилоят судининг судьялари Б. Жумабоев ва Ҳ. Келдиёрова Самарқанд шаҳридаги 7-мактабда, Ж.Арсланов ва О.Набиев эса 13-умумий ўрта таълим мактабида битирувчи синф ўқувчилари билан мулоқот ўтказишди.
Мулоқотлар интерфаол тарзда ташкил этилиб, ўзаро фикр алмашиш, ўқувчиларни ҳам қизғин мулоқотга жалб этиш, савол-жавобларга кенг ўрин бериш шаклида ўтказилди. Тадби рларнинг жонли ва самарали бўлишига эътибор қаратилди

Skip to content